ஒரு நாளைக்கு இரண்டு முட்டைகள் சாப்பிடுவது முன்கூட்டிய மரணத்தை ஏற்படுத்தும்; ஆய்வில் தகவல்.

முட்டை சாப்பிடுவது நம் உடல்நலனுக்கு நல்லதா கெட்டதா என்ற விவாதம் நீண்டகாலமாக நீடித்து வருகிறது.

இதற்கான பதில், நீங்கள் ஒரு வாரத்துக்கு எத்தனை முட்டைகளை எடுத்துக்கொள்கிறீர்கள் என்பதைப் பொறுத்தது என்கிறது ஒரு புதிய ஆய்வு.

ஒரு நாளைக்கு இரண்டு முட்டைகள் சாப்பிடுவது, இதயநோய் மற்றும் முன்கூட்டிய மரணத்தை ஏற்படுத்தும் வாய்ப்புகளை உருவாக்கும் என்று அதில் கூறப்பட்டுள்ளது.

இதற்குக் காரணம், முட்டையின் மஞ்சள் கருவில் இருக்கும் அதிக அளவிலான கொழுப்பு. பெரிய முட்டை ஒன்றில் சுமார் 185 மில்லிகிராம் கொழுப்பு இருக்கும் என அமெரிக்க விவசாயத் துறை கூறுகிறது. நாள் ஒன்றுக்கு 300 மில்லிகிராம் கொழுப்பை உட்கொள்ளலாம் என்று உலக சுகாதார அமைப்பு பரிந்துரைத்து உள்ளது.

இதுதொடர்பாக, மொத்தம் 17 ஆண்டுகளில் 30 ஆயிரம் பேர் பங்கேற்ற ஆறு ஆய்வுகள் செய்யப்பட்டன.

நாள் ஒன்றுக்கு 300 மில்லிகிராம் கொழுப்பு எடுத்துக்கொள்வது, இதயநோய்க்கான அபாயத்தை 17 சதவீதம் அளவுக்கும், முன்கூட்டியே மரணம் ஏற்படுவதை 18 சதவீதம் அளவுக்கும் உயர்த்தியதாக ஆய்வாளர்கள் முடிவுக்கு வந்தனர்.

முட்டைகளைப் பொறுத்தவரை, ஒரு வாரத்துக்கு மூன்று அல்லது நான்கு முட்டைகள் உட்கொண்டால், இதயநோய் ஏற்படும் அபாயம் 6 சதவீதம் அதிகமாக இருப்பதாக கண்டுபிடிக்கப்பட்டுள்ளது. அதேபோல, இது முன்கூட்டியே மரணத்தை ஏற்படுத்துவதற்கான அபாயம் 8 சதவீதம் அதிகமாக உள்ளது.

ஒரு நாளைக்கு இரண்டு முட்டைகள் சாப்பிடுவது, மேற்கண்ட இரண்டு நோய்கள் ஏற்படும் அபாயத்தை 27 மற்றும் 34 சதவீதம் அதிகமாக்குகிறது.

இந்த ஆய்வானது, வயது, உடற்பயிற்சி நிலைகள், புகையிலைப் பயன்பாடு அல்லது ரத்த அழுத்தம் போன்ற எதையும் கணக்கில் எடுக்காமல் மேற்கொள்ளப்பட்டது.

‘‘இரண்டு நபர்கள் ஒரே மாதிரியான உணவு முறையைப் பின்பற்றி, முட்டைகள் எடுத்துக்கொள்வது மட்டும் வேறு மாதிரியாக இருந்தால், அதிகம் முட்டை உண்பவருக்கு இதயநோய் வரும் வாய்ப்பு அதிகமாக இருக்கிறது’’ என்கிறார், நார்த் வெஸ்டர்ன் பல்கலைக்கழகத்தின் தடுப்பு மருந்து பிரிவின் இணை ஆசிரியர் நொரினா ஆலன்.

முட்டைகள் உட்கொள்வதற்கும், இதயநோய்க்கான அபாயத்துக்கும் எந்தத் தொடர்பும் இல்லை என்று கூறப்பட்ட முந்தைய ஆய்வுடன் இந்தப் புதிய ஆய்வு முரண்படுகிறது.

ஆனால், முந்தைய ஆய்வுகளில் குறைந்த வேறுபட்ட மாதிரிகளே இருந்தன என்றும், குறுகிய காலம் மட்டுமே அவர்கள் கண்காணிக்கப்பட்டார்கள் என்றும் ஆலன் கூறுகிறார்.

எனினும், தங்கள் ஆய்வுகளில் சிறு தவறுகள் இருக்கலாம் என் ஆய்வாளர்கள் ஒப்புக்கொள்கிறார்கள்.

சரி, பொதுவாக எத்தனை முட்டைகளை உட்கொள்ளலாம்?

இந்த ஆய்வை இணைந்து மேற்கொண்ட ஆலன், ஒரு வாரத்துக்கு மூன்று முட்டைகளுக்கு மேல் சாப்பிடக் கூடாது என்கிறார்.

அதுவும், முட்டையின் வெள்ளைக்கருவை உண்ணுமாறு முட்டைப் பிரியர்களுக்கு அவர் பரிந்துரைக்கிறார்.

‘‘முட்டை சாப்பிடுவதை முழுவதுமாக நிறுத்திவிட வேண்டும் என்று நான் கூறவில்லை. சரியான அளவு எடுத்துக்கொள்ள வேண்டும் என்கிறேன்.’’

இந்த ஆய்வு, அமெரிக்கர்களை வைத்து மேற்கொள்ளப்பட்டது என்பது குறிப்பிடத்தக்கது.

அதிகம் முட்டை சாப்பிடுபவர்களின் எண்ணிக்கை கொண்ட நாடுகளின் பட்டியலில் அமெரிக்கா 5-வது இடத்தில் உள்ளது. ஓர் அமெரிக்கர், ஆண்டொன்றுக்கு 252 முட்டைகளை உட்கொள்கிறார். இந்தப் பட்டியலில் மெக்சிகோ (352) முதலிடத்தில் இருக்கிறது.

SHARE